15 Aprel 2024-cü il tarixdə Qazax rayon Mərkəzləşdirilmiş Kitabxana Sisteminin E. Hüseynov adına Mərkəzi kitabxanası oxu zalında Xalq yazıçısı, ssenarist, nasir Çingiz Abdullayevin anadan olmasının 65 illiyi münasibətilə “Ailə sirləri” adlı kitab müzakirəsi keçirib. 

Tədbirdə BDU-nun Qazax filialının və Qazax Dövlət Sosial-İqtisadi Kollecinin tələbələri, fəal oxucular və kitabxana əməkdaşları iştirak ediblər. Şöbə müdiri Bəsdi Məmmədova Xalq yazıçısı, “Şöhrət” və “Şərəf” ordenlərinə layiq görülmüş Çingiz Abdullayevin həyat və yaradıcılığı haqqında ətraflı məlumatında bildirib ki, ədəbi fəaliyyətə hələ tələbəlik dövründə oçerk, məqalə və detektiv janrda yazdığı hekayələrlə başlayan Çingiz Abdullayev rus dilində psixoloji və siyasi detektiv janrında əsərlər yazan yeganə azərbaycanlı yazıçıdır. Az müddətdə əsərləri ilə dünyanın müxtəlif ölkələrində tanınan yazıçı həm də “Dünya Azərbaycanlıları Mədəniyyət Mərkəzi”nin prezidenti, müxtəlif beynəlxalq ittifaqların prezidenti və vitse-prezidenti kimi şöhrət qazanmışdır. Dünyanın müxtəlif ölkələrində kütləvi tirajlarla buraxılan yazıçıının əsərlərini sevərək oxuyan tələbələr onun ümumi yaradıcılığı haqqında, xüsusilə 2009-cu ildə nəşr olunan “Ailə sirləri” adlı kitabı haqqında fikirlər yürüdüblər.