17 may  2024-cü il tarixdə Qazax rayon MKS-nin E.Hüseynov adına Mərkəzi kitabxanası18 May Beynəlxalq Muzeylər Gününə həsr olunmuş  “Mədəni sərvətlərimizi tanıyaq” adlı tədbir keçirib. Kitabxananın bir qrup fəal oxucusu  və kitabsevərlər öz  istəkləri ilə milli-mədəni irsimizi, elm, informasiya ehtiyatlarını toplayıb mühafizə edən, bilik məbədi olan kitabxanamızda qonaq olublar. Kitabxananın fondunda müxtəlif elm sahələri üzrə ədəbiyyatla tanış olub, kitabların fondda elm sahələri üzrə düzülüşündə həvəslə iştirak ediblər. Oxuculara xidmət şöbəsinin  multimedia mütəxəssisləri ziyarətçiləri dövrün tələbinə uyğun olaraq  informasiyanın sürətlə və düzgün əldə edilməsi üçün kitabxanada yaradılan şəraitlə tanış edib, məlumat bazalarında mövzuya uyğun olaraq xüsusi informasiya resurslarında axtarış yolları haqqında məlumat veriblər.
Ziyarətçilər bilik mənbəyi olduğu kimi, həm də mənəviyyat məbədi olan kitabxanada keçirdikləri vaxtdan razı qaldıqlarını bildirib, xatirə şəkli çəkdiriblər.
Eyni zamanda, kitabxana əməkdaşları Qazax Tarix–Diyarşünaslıq Muzeyinə ekskursiya təşkil ediblər. Beynəlxalq Muzeylər Günü münasibətilə muzey əməkdaşlarını təbrik edib, mədəni sərvətlərimizin saxlanc yeri olan muzeydə Azərbaycanın qədim tarix və zəngin mədəniyyət nümunələrini əks etdirən eksponatlarla tanış olublar. Azərbaycanın Zəfər tarixini yazan Vətən Şəhidlərinə həsr olunmuş guşəyə xüsusi ehtiramla baxış keçiriblər.