10 iyun 2024-cü il tarixdə Qazax rayon Mərkəzləşdirilmiş Kitabxana Sisteminin E.Hüseynov adına Mərkəzi kitabxanası oxu zalında Xalq şairi, Əməkdar incəsənət xadimi, dramaturq Vaqif Səmədoğlunun anadan olmasının 85 illiyi münasibəti ilə “Poetik tapıntılarla zəngin Vaqif Səmədoğlu” adlı tədbir keçirib. Tədbirdə bir qrup tələbə, fəal oxucu və kitabxana əməkdaşları iştirak edib. Şöbə müdiri Bəsdi Məmmədova Xalq şairi, “Şərəf” və “İstiqlal” ordenli, “Humay”, “Nəsimi” mükafatı laureatı  Vaqif Səmədoğlunun həyat və yaradıcılığı haqqında ətraflı məlumatında onun yaradıcılığı ilə Azərbaycan ədəbiyyatına yeni abu-hava, poeziyada yeni mərhələ gətirdiyini qeyd edib. Vətənpərvər şairin xalqının zəngin ədəbi-bədii irsinə, milli folkloruna tükənməz məhəbbəti yaradıcılığında xalq ləhcəsindən, şivəsindən yetərincə istifadə etməsinə səbəb olub. Tədbirdə çıxış edən tələbələr şairin dillər əzbəri olan dram əsərlərinin, insanı düşündürən lirik-fəlsəfi düşüncəli bənzərsiz təkrarsızlığı ilə seçilən şeirlərinin  sevilərək oxunduğunu,  ssenari müəllifi olduğu filmlərin böyük tamaşaçı məhəbbəti qazandığı haqqında mülahizələrini  söyləyiblər. Fəal oxucuların ifasında şairin şeirlərindən seçmələr dinlənilib, mövzuya həsr olunmuş “Poetik tapıntılarla zəngin Vaqif Səmədoğlu” adlı sərgi ətrafında diskussiya aparılıb.