28.06.2024-cü il tarixdə Tovuz rayon H.Bozalqanlı adına Aşıq Sənəti Dövlət Muzeyində muzeyin əməkdaşlarının və Tovuz rayon Yusif Sadıqov adına Bozalqanlı kənd tam orta məktəbinin müəllim və şagirdlərinin iştirakı ilə Narkomaniyaya və Narkobiznesə qarşı Beynəlxalq Mübarizə Günü ilə əlaqədar  "Narkotiklər bütün dünyanın bəlasıdır" adlı tədbir keçirilib.
Tədbirdə muzeyin əməkdaşları yeniyetmələrlə maarifləndirici söhbətlər apararaq bildiriblər ki,
hazırda bütün dünyanı ciddi şəkildə narahat edən narkomaniya ağrılı bir problem olmaqla yanaşı, əhatə dairəsini getdikcə genişləndirərək ümumbəşəri bəlaya çevrilmişdir. Narkotik vasitələrə aludəçilik cinayətkarlıq, zorakılıq və digər neqativ hallar üçün münbit zəmin yaradan mühüm amillərdən biri olaraq məhsuldar qüvvələrin inkişafına mənfi təsir göstərməklə gəncləri sosial-iqtisadi və siyasi proseslərdən uzaqlaşdırır, ailələrin və bütövlükdə cəmiyyətin inkişafını ləngidən ağrılı bir prosesə çevrilir. Bir sıra başqa dövlətlərlə müqayisədə respublikamızda narkotizm o qədər də dəhşətli şəkil almamışdır. Lakin,son illər bütün dünyada olduğu kimi, ölkəmizdə də bu sahədə məqsədyönlü tədbirlər həyata keçirilir, narkotik vasitələrin qanunsuz dövriyyəsinə qarşı mübarizə tədbirləri gücləndirilir.