25 fevral 2026-cı il tarixində M. Əliyev adına Yuxarı Öysüzlü kənd tam orta məktəbinin tarix müəlliməsi İradə Məmmədova Tovuz rayon Tarix- Diyarşünaslıq Muzeyində şagirdlərə tarix dərsi keçdi. Tarix dərslərinin məhz muzey mühitində keçirilməsi şagirdlərin mövzunu daha dərindən və maraqla mənimsəməsinə şərait yaradır. Sinif otağında öyrənilən nəzəri biliklər muzeydə real eksponatlar vasitəsilə canlı təsəvvürə çevrilir. Muzeydə keçirilən dərslər interaktiv xarakter daşıyır. Bələdçilərin izahları, təqdimatlar, sual-cavab sessiyaları və müzakirələr şagirdlərin fəal iştirakını təmin edir. Şagirdlər təkcə dinləyici olmur, həm də araşdıran, müqayisə edən və nəticə çıxaran tərəfə çevrilirlər. Bu üsul onların tənqidi düşünmə və təhlil bacarıqlarını inkişaf etdirir. Tarix muzeyində dərs keçmək həm də vətənpərvərlik hissinin güclənməsinə xidmət edir. Tarixi şəxsiyyətlərin fəaliyyəti, milli qəhrəmanların mübarizəsi və xalqımızın keçdiyi çətin yollar şagirdlərdə milli kimlik və qürur hissi formalaşdırır. Muzey mühiti şagirdlərdə tarixə hörmət və maraq oyadır.