15 dekabr  2017-ci il tarixdə Ağstafa Regional Mədəniyyət və Turizm İdarəsinin  Qazax Dövlət Rəsm Qalereyasında “Sülh  istəyirik” adlı rəsm sərgisi keçirilmişdir. Sərgidə Region İdarənin nümayəndələri, İcra Hakimiyyət aparatının məsul işçiləri, Bakı şəhərindən 11 nəfər qonaq və rayon ictimaiyyəri iştirak etdi. Xalq rəssamları Qəyyur Yunus, Azərbaycan Rəssamlar İttifaqının katibi Ağaəli İbrahimov, Arif Hüseynov, Qafar Sarıvəlli, rəssamlar Aynurə Mustafayeva, Nəcməddin Hüseynov iştirak  etdilər. Eyni zamanda Xətai Sənət Mərkəzinin direktoru Zahid  Əvəzov, Azərbaycan Yazıçılar birliyinin üzvü Bayandır Sevgin, şair Zaməddin Ziyadoğlu, Sənətşünaslıq üzrə fəlsəfə doktoru, Mədəniyyət və İncəsənət Universitetinin  müəllimi Nəzakət Əhmədova, Dövlət Rəsm Qalereyasının nümayəndəsi Vaqif  Muğalov, Dövlət Rəsm Qalereyasında böyük elmi işçi Rəna Rəcəbova qonaqlar  arasında idi.

Tədbiri  giriş sözü ilə Qazax Rayon İcra Hakimiyyətinin  başçısı Rəcəb Babaşov  açdı. O, məruzəsində tədbirin əhəmiyyətindən, gənclərin sağlam ruhda tərbiyyə olunmasının önəmindən danışdı. O,”Yalnızca Barışa  Tarafız” layihəsi əsasında  keçirilən “Sülh  istəyirik” adlı sərginin təşkilatçısı Akif  Əmirova və Qazax   Dövlət Rəsm Qalereyasının  direktoru Münəvvər Xəlilovaya təşəkkürünü  bildirdi. Qonaqlar çıxış edərək tədbirin təşkilinin səviyyəsindən və əhəmiyyətindən danışdılar. Bu sülhməramlı sərginin təşkilində əməyi keçən hər kəsə təşəkkür  etdilər. Sərgidə işləri nümayiş olunan rəssamlara və şagirdlərə, eyni zamanda əməyi keçənlərə sertifikat verildi.